صباح الخير
الحلم تفسيره صعب تتعب من الحلم العقول
مثل السنين اللي مضت شفها هذيك أطلالها
والناس من خلقت وكل واحد وله راي وميول
لا تزعل امن البارحه قول الوعد بقبالها
بقول لك حاجه وابي منك لحسادي تقول
وان كان ما تقدر تقول قل ثامر اللي قالها
من جيت للساحة وانا واصل ولا بحاجة وصول
قصايدي توصل ولو قلّت دروب اوصالها
قصايدي ارضت لها ناس وزعل منها زعول
قصايدي أبكت قلوب الله عليم بحالها
قصايدي خلت لها شيخان من باب الفضول
تسأل عن اسمي وحالتي احساسي شاغل بالها
كم بنت ابوها ما عرفت اسمي عطت شعري قبول
ابيات شعري امخزّنه في محفظة جوالها
ما هو غرور ولا كبر بس انزعجت امن الطبول
اللي تدن اطبولها وشعارها تبرا لها
يبقى الصحيح اهو الصحيح الروس ما تتبع ذيول
وجه الرجال وقدرها يحسب بقد أفعالها
والبارحه يوم اقصرت عني وأنا كفي تطول
علمتها لا تقترب بقصارها لطوالها
سقت الحمول اللي اشتكى من حملها طير وذلول
ما خفت من غدر القلوب اللي غدرت بعيالها
اصول فالساحه وأجول أجول فالساحه وأصول
ما همني لاجدها ولا عمها ولا خالها
انا كذا امن الله خلقني ما عرف درب النزول
عودت رجلي للصعب صار الصعب يحلا لها
هذا وأنا لحالي اجل وشلون لو جيت محمول
شفت الثريا لو أصيح لعبس راح أرقا لها
ربعي ليا صكت علي يبكي على الحكم معزول
لي لابتن من دون قاصر ما نشرب فنجالها
بني رشيد ليا اصطفق موج البحر سالت سيول
يا سعد عين أم الضعيف اللي تكون بجالها
يوم انها بالسيف والشلفا على ظهور الخيول
كم من قبيلة طيبه امست بلا خيالها
يا ما عفينا لخاطر العقال زلات مهبول
ندمح وعقال المهبل تلفت لهبالها
لكن ليا منا بطشنا بطشنا ما هو معقول
ندعس على روس المهبل ورقبة عقالها
قلته وانا ماني بمن قوم ابهته بحكي معسول
من روس قومن اثبتت افعالها اقوالها
اكرّم الطيب ولا تسوى الفحول الا الفحول
ما تلحق الشكه فحل بدقاقها واجلالها
اما الردي اجنبه مال الخبول الا الخبول
مثل المره مالي حكي الا مع رجالها
بعض الرجال ليا مشى وياك خذ وياك زول
بعض النسا تومي عليه ليا وقف واومالها
يعجبك في زوله ولكن بالفعل ما من فعول
يا كثرها افعال الرجال اللي خدعتك ازوالها
استغفر الله ونعمتك يا الله عساها ما تزول
لو النعم في يد غير الله علينا زالها
يالله ياللي ترمي اللقمة على فم معقول
تغنيه عن مد العرب اجوادها وانذالها
انك تسامحني اذا زليت في قوة وحول
انا الضعيف اللي ترك نفسه على موالها
كل ما ذكرت ان البدو كانت من اصحاب الرسول
استغرب ان التفرقة كيف اقدرت تغتالها
ويا صاحبي كثر الحكي ضيق على الصدر الملول
هذي البلاد ان ظامتك دور ابلاد ابدالها
هذا بخصوص الشعر حمل اخذه وباقي لك حمول
مثلك حموله كل ما زادت نهض واشتالها
واذا خلصت امن الشعر حول على اللي ما تجول
الا بصدري يوم صدري بيتها وظلالها
سولف لها عني تراه لسانها طبعه خجول
اقرا كلام عيونها وجاوب على سؤالها
اذا اسألت عن عهدنا بنت الاكابر والاصول
قل شاعرك ما صافح كفوف الرجال لمالها
واذا اسألت عن حالتي طمنها كان انها جفول
قل حالتي في خير دام انها في خير احوالها
واذا اسألت عن الوصل تبغى من يديك الحلول
قل شهر كان الله كتب لازم اكون قبالها
واذا اسألت عن الشعر تبيك من شعري تقول
قل هذي اخر ما كتب من قلب صادق قالها
اللهم صلي وسلم على سيدنا محمد